أمير أبو المجد يكتب .. رؤية موضوعية لإستحقاق مجلس الشيوخ القادم

Share it:
كتب | أمير أبو المجد 

فى محافظتى محافظة البحر الأحمر التى تعد ثالث أكبر محافظة فى مصر من حيث المساحة، ولدى كل مدينة بداخلها وكل منطقة ما يميزها عن غيرها، و إن كان يوجد تفاوت بين تلك الميزات بين الجنوب و الشمال لكننا ندرك جميعاً أنها بالكامل مميزة للغاية! لذلك اسمحوا لي أن اكمل حديثى بالعامية حتى يحقق الغاية منه ويصل لكل من يريد أن يفهم ما نحن فيه. 

صديقى و استاذى مرشح مجلس الشيوخ، المجلس دا معمول علشان مجموعة من الاهداف اللى أهمهم " مناقشة " الاقتراحات أو تعديل اى مادة من مواد الدستور وكمان برضوا " مناقشة " الخطة العامة للملفات الخاصة بالتنمية سواء التنمية الاقتصادية أو التنمية الاجتماعية، طيب تعرف كمان سيادة المرشح أن هيكون دورك " مناقشة " مشروعات القوانين، بالإضافة انك هيكون ليك دور فى قرارات معاهدات الصلح والتحالف وطبعا جميع المعاهدات التي تتعلق بحقوق السيادة !

بإختصار شديد ونقطة عاوز اوضحها لجميع السادة المرشحين لعضوية مجلس الشيوخ وهما جميعاً ناس أفاضل، ومحترمين، المسئولية على حضراتكم مش مسئولية عضو وخلاص أو أنه يبقى عضو فى الغرفة التانية للبرلمان وخلاص ! يمكن ذكرت كلمة مناقشة اكتر من مرة فى كلامى لأن بالبلدى كدة طالما انت هتناقش يعنى هيبقى وجودك مهم فلو معندكش القدرة على المناقشة دى او مش هقدر تبقى منتج فيها للاسف هيبقى وجودك زى عدمه، ودى أمانة هتتسأل عنها ولازم تبقى عارف كدة كويس. 

كلمتى للشباب بما انى واحد منهم، خلى صوتك مهم انت مثقف ومتعلم وليك صوت ليه قيمة وقيمة قوية ومهمة جدا ، اقرى عن كل مرشح كويس واقرى السيرة الذاتية بتاعته و اقرى عن اختصاصات مجلس الشيوخ كويس، كل دا مش هياخد منك ساعتين زمن بس، عشان لازم تبقى عارف انت مسئول عن اختيارك، مسئولية كاملة، وهتكون شريك فى اى حاجة إيجابية أو سلبية ممكن تحصل .. وربنا يولى من يصلح.
Share it:

مقتطفات طلابية

Post A Comment: