لسه شايف ان بعد سنة كاملة مذاكرة و مجهود ان ده المطلوب علشان تحدد مستقبلك و مجالك المستقبلي واقف علي المجموع ؟
لو اجابتك كانت اه ف انتا محتاج تفكر شوية، ولو هنشوف الموضوع من جانب تحديد المستقبل الخاص بيك في سوق العمل فانت في مرحلة اسمها (Exploration phase) او مرحلة الاستكشاف اللي بتكون من سن 18 لحد 25 يعني بتشمل فترة الثانوية و الجامعة دي فترة بتبدء تكتسب فيها مجالات اكتر تقدر تشتغل فيها و مع احتمالية ان المجالات دي كلها ملهاش علاقة بدراستك، طب نرجع للارقام اكتر من 30% من كليات اختصاصها ملهوش وظائف في سوق العمل حاليا و ان 50% من الخارجين مش بيشتغلوا في مجال دراستهم و ان علشان تحدد الوظيفة اللي تناسبك فانت هتغير من 5 الي7 مرات وظائف مختلفة في حياتك و ده معدل طبيعي جدا
لسه شايف انها واقفة علي المجموع و الكلية ولا بدأت تقتنع ؟
الكاتب برتراند ريغادير قال في تقرير نشرته مجلة "بسيكولوخيا إي مينتي" الإسبانية ان الطلاب اللي حصلت علي درجات متوسطة و ضعيفة هي اللي عندها (Failure management ) او اداراة الفشل و ده عكس الطلاب اللي حصلت علي درجات عالية هيكون صعب عليهم التفكير في جوانب تانية غير الدرجات و إن من الصعب ربط علاقة بين نجاجك الدراسي و نجاحك في المستقبل لان مفيش صلة بينهم ونهى المقال و قال انه من الناس اللي جابت درجات متوسطة في الدراسة
اقتنعت شوية اكتر صح ؟
فكرة المجموع العالي و الكلية الاعلي مجموعاً مش بالضرورة يكون الاختيار الانسب ليك من الممكن يكون مجموعك من متوسط لضعيف و يكون ده بداية نجاحك و تغيير طرق تفكيرك يكون فرصة تتدخل مجال متعرفش عنه حاجة و تكتشف نفسك فيه الفكره كلها مش بمجموعك هي في طريقة تفكيرك بإنك تقدر تعمل ايه، قدراتك تقدر تعمل ده فعلا طرق تفكيرنا و ادراكنا الكامل بالفرص المتاحة ده اللي بيحدد مستقبلنا قبل الدرجات و المجموع.
وقبل ما النتيحة تظهر، لو انت من اصحاب الدرجات العالية فمبروك ليك و ان دي مجرد خطوة لازم تخطط اكتر ليها و تعرف ان مش معني انك تدخل الكلية اللي بتحلم بيها كده هيكون انتهى المشوار و اتحدد مستقبلك خلاص، لإنى احب اقولك انها مجرد بداية ليك ولو انت من اصحاب الدرجات المتوسطة او الضعيفة فمبروك اكتر و اكتر علي قدرتك انك تلقي اكتر من فرصة تنجح فيها و تثبت نجاحك و تحدد مستقبلك باكتر من طريقة هتصنعها بنفسك.
شوفت انها واقفة عليك مش علي المجموع ؟