بقلم | سارة على قطب
كلية علوم الاسم اللي اول ما حد بيسمعه بيتخض وبيقول لا دي صعبة بلاش منها و اللي بيتخرجوا منها ناس معقدين، قبل ما ادخل علوم سمعت الكلام ده كتير واتقالي بلاش منها كتير بردو وناس كتير من صحابي استبدلوها بكليات تانية بس انا قررت ادخلها وقولت مفيش حاجة صعبة علي الانسان اللي بيذاكر ويجتهد ومندمتش لحظة علي ده حقيقي و لو رجع بيا الزمن هختارها تاني، مش هتكلم كتير عن نفسي تعالوا احكيلكم عن الكلية شوية.
هل الكلية صعبة ؟
اه هي صعبة بس مش مستحيلة ومش صعب النجاح فيها، كلية علوم من اعظم الكليات اللي ممكن تقابلها ومهدور حقها حقيقي في مصر وفي الكلام عنها وعن خريجينها، من مميزات الكلية انها لعلمي علوم وعلمي رياضة، كمان الكلية فيها حوالي ٢٣ قسم متقسمين حسب الشعبتين وفي اقسام تنفع للشعبتين مع بعض وده بيوفر فرص كتير للشخص انه يتخصص في مجال يحبه وكمان بيخلي مجالات شغل خريج علوم واسعة ومختلفة.
ايه هي اقسام الكلية؟
زي ما قولت من شوية في اقسام لعلمي علوم واقسام لعلمي رياضة واقسام مشتركة بين الاتنين قبل ما ابدأ اتكلم عنهم تفصيليا حابة اوضح حاجة بجانب اللي قولته في اقسام مزدوجة واقسام منفردة في الاقسام المزدوجة بنتخصص في حاجتين وده طبعا بيزود من فرصنا ومجالاتنا وفي اقسام منفردة بنتخصص في علم واحد بس، اول حاجة هبدأ بيها هي اقسام علمي علوم.
١- قسم كيمياء/ حيوان وده قسم مزدوج بين الكيمياء وموادها وبين علم الحيوان واحب اوضح ان المقصود بعلم الحيوان مش الحيوانات وكده لا الانسان مصنف انه موجود اعلي المملكة الحيوانية، القسم ده بقي هو قسمي العزيز يمكن مدخلتش الكلية عن حب بس دخلت القسم ده عن حب لدرجة اني حبيت بسببه الكلية، في القسم ده هتدرسوا مواد الكيمياء بتوسع هتدرسوا كيمياء عضوية وكيمياء فيزيائية و كيمياء غير عضوية وكيمياء تحليلية وكل انواع الكيميات اللي تخطر علي بالكم ده بالنسبة للكيمياء طيب علم الحيوان بقي ده من امتع المواد اللي هتدرسوها حقيقي هتدرسوا علم المناعة و علم الطفيليات و علم البيئة وعلم الانسجة و هتدرسوا الفقاريات و اللافقاريات وعلم الوراثة وعلم الاجنة و علم امراض الدم الهيماتولوجي و كمان الفسيولوجي بقي علم وظائف الاعضاء وده هتدرسوا فيه الهرمونات والغدد والجهاز الهضمي والانزيمات وعمليات الايض اللي بتحصل جوه الجسم والجهاز العصبي واجهزة جسم الانسان وكل حاجة جوانا حقيقي من امتع المواد هي مواد القسم ده وكلامي عنه مش هيخلص وبالنسبة لفرص العمل الخاصة بيه هو كل مجالات الكيمياء اللي هتكلم عنها بالتفصيل قدام و مجال الحقن المجهري واطفال الانابيب وبنوك الدم والمراكز الطبية لعلم الاجنة ومراكز ومعاهد البحوث المختلفة.
٢- كيمياء / كيمياء حيوي: بيدرس العمليات الحيوية في جسم الانسان زي البروتين والفيتامينات والكربوهيدرات وبيدرس الاحماض النوويه (DNA) وعلم المناعة وعلم الوراثة وعلم الهرومونات والانزيمات وجميع التفاعلات الكميائيه الخاصة بالكائن الحى وجسم الانسان و بيدرس كيميات كتير (كيمياء عضوية وغير عضوية وتحليلة وفيزيائية وكيمياء الفيتامينات) ،( مجالات العمل ) : كل الشغل الخاص بالكيمياء واللي هنتكلم عنه في قسم كيمياء منفرد ومعاهد الاورام ، ومعاهد السرطان.
٣- كيمياء / كيمياء ميكروبيولوجي: الميكروبيولوجى هى علم الاحياء الدقيقة وتدرس فيها كل فروع الميكروبيولوجى (البكتريا والفطريات والطحالب والفيروسات) وحياتها وكل حاجة عنهم ، بتدرس تأثير الميكروبيولوجي على الانسان والامراض اللي بيسببها والانزيمات ، والسموم الميكروبية ، الهرمونات النباتية ، علم المناعة ، علم الوراثة ، علم الاحماض النووية (DNA) ، ميكروبيولجي طبية ، ميكروبيولوجي الاغذية ، الاحصاء الاحيوي وتدرس نص مقرراته كيمياء.
مجالات العمل : فى معامل وشركات التحاليل الطبية ، وشركات الادويه ، وفى المستشفيات ، وفى معامل المكيروبيولوجي ، وتنقية المياة فى محطات وشركات المياة ، وشركات الاغذية ، شركات الالبان ، شركات الكيماويات.
٤-كيمياء / نبات: بيدرس نص مواده كيمياء ونصها من علم النبات ، فيدرس كل ما يتعلق بالمملكه النباتية بداية من تشريح النبات ، علم المناعه ، الفسيولوجى ، اناتومى ، علم التنفس ، علم البيئة ، علم الوراثة ، علم الميكروبيولوجى ، علم الطحالب ، علم النباتات طبية ، الاحياء الدقيقة وتطبيقاتها ، بيوتكنولوجى ، علم الفلورا ، الهندسة الوراثية ، زراعة انسجة ، والمورفولوجى والبيولوجي بتاع النبات وتصنيفاته والعوامل البيئيه اللي بتأثر فيه و التلوث والانزيمات والطحالب ، ( مجالات العمل ): نفس شغل قسم كيمياء منفرد.
٥- كيمياء / حشرات : بتدرس نص المواد من كيمياء ونصها من علم الحشرات ، فيدرس البيولوجي الخاص بالحشرات و تشريح انسجتها و الشكل الخارجى للحشرات و تصنيفاتها و تقسيماتها ، علم بيئة الحشرات ، علم الطفيليات ، الوبائيات و تحاليل الطفيلية ، والفيسيولوجي للحشرات ، ومكافحه الآفات والسيطرة عليها ، علم المناعة ، علم الميكروبيولوجي ، الباثولوجي للحشرات ، علم السموم ، الشكل الخارجى والداخلى والأداء الوظيفى للحشرة ، أنماط الحياة ، التأثيرات البيئية والدورة الفصلية ، أشكال التأثيرات المتبادلة فى الآهلات الحيوية المجموعات الهامة للحشرات ، الحشرات النافعة ودورها فى تلقيح النباتات ونشر البذور ، المنتجات التجارية المشتقة من الحشرات ، الحشرات المفترسة والمتطفلة ، أهمية الحشرات ككانسات ، الحشرات فى النظام البيئي وغيرها ، ( مجالات العمل ) : نفس شغل الكيمياء + مصانع المبيدات الحشرية ، مراكز مكافحة الحشرات ، معامل البحوث الزراعيه ، وزارة الزراعة وغيرها.
٦-بيوفيزياء منفرد : البيوفيزياء هي علم قائم بذاته ومختلف عن الفيزياء و الاحياء ، هو يعتبر تطبيق لمباديء الفيزياء وتقنياتها لدراسة تركيب ووظيفة الخلية الحية ودراسة بعض القوانين الفيزيائية التي تؤثر في الجزيئات الحيوية والعمليات الحيوية ندرس بها الكهربية خلال الجسم الحيوى والجهاز العصبى والخلية العصبية ، الجهد الكهربى للأعصاب ، رسم عضلات القلب والمخ والعين ، فيزياء الأشعة السينية التشخيصية ، استخدامات الانويه المشعه فى أجهزه القياس الإشعاعى الأساسية وتطبيقاتها والوقاية من الإشعاع ، وحدات الوقاية الإشعاعية وحدودها فى الطب النووى ، تطبيقات الحرارة والبرودة ، حفظ الدم والأنسجة والجراحه بالتبريد ، وإستخدام الضوء فى الطب فلها تطبيقات في الطب حيث توفر تفسيراً للعلاقات الوظيفية بين أجزاء الجسم وفي دراسة نظام المناعة ضد الامراض وتم اعتماد أربع تخصصات رئيسية وهى: البيوفيزياء الجزيئية و الطبية و النظريه و البيئية والمدرستين المتخصصتين واللى ليهم النصيب الكبير من الاهتمام والتطور هما البيوفيزياء الجزيئية والبيوفيزياء الطبيه ، وشغله: في المستشفيات والمعاهد الطبيه زي الاورام ومعاهد الليزر ومعهد بحوث امراض العيون ، والقصر العيني ، 57357 ، فى مراكز البحوث زي البحوث النووية ، بحوث الاشعاع والاشعاعات واثرها علي الخلايا ، المركز القومى للبحوث ، التصوير الاشعاعى والعلاج الاشعاعي ، شركات الاجهزة الطبية والمناظير.
٧- جيولوجيا منفرد: الجيولوجيا هي علم دراسة وكيفية تكوينها وتطورها ، هتدرس الميكانيكا اللى بتتكون بيها الظواهر الطبيعية زي الجبال العادية والجليدية والبراكين وتاريخ الارض منذ النشاة وترتيب تكونها ، تقدير عمر الأرض النسبي والمطلق ، الجدول الزمني لتاريخ نشأة الأرض ، الحفريات والتحفر ، التبلور ، الخواص الفيزيائية والكيميائية للمعادن وتقسيماتها وانواعها ، كمان هتدرس جيولوجيا البترول وجيولوجيا المياة ، وجيولوجيا حقلية وغير حقلية ، وجيولوجيا مصر وافريقيا وغيرها ، ( مجالات العمل ) : في شركات البترول ، والمياه ، وجهاز شئون البيئه ، وقطاع الاثار ، والمناجم ، الهيئة القومية للاستشعار عن بعد ، علوم الفضاء ، المراصد الجيولوجية ، شركات التعدين والمحاجر.
تاني حاجة بقي هي الاقسام الخاصة بعلمي رياضة بس:
٨- حاسب منفرد: بتدرس مبادئ البرمجة من النظم العددية والخوارزميات وهياكل البيانات ونظم التشغيل وقواعد البيانات والذكاء الاصطناعى والتشفير وغيرها ، وشغله واسع اوى فى الكمبيوتر والسوفت وير ، هى شبه قسم علوم حاسب فى كلية حاسبات ومعلومات والفرق ان عندنا الاهتمام بالنظرى والرياضة على حساب التطبيق بس لو قدرت تفهم النظرى كويس هيبقي سهل عليك تتعلم اى تطبيق عليه وهتبقي كويس عن اى حد ولازم تاخد كورسات عشان تطور نفسك ، ولو اتخرجت بتقدير جيد تقدر تقدم فى منحة وزارة الاتصالات (ITI) ، ( مجالات العمل ) : فى وحدات تكنولوجيا المعلومات فى الشركات والمدارس والجامعات ، مطور برامج ، مصمم او مطور شبكات ، مطور تطبيقات الموب ، مطور جافا ، مصمم قواعد بيانات وغيرها.
٩- رياضيات منفرد: يعني رياضه باحته وتطبيقية يعنى لو بتعشق الرياضة وقدها ادخله، ( مجالات العمل ) : فى المجال الاكاديمي ، معيد سواء فى جامعة حكومية او خاصة، مراكز الاحصاء والمتابعة ، معامل الابحاث ،هيئات الأ رصاد الجوي ، مراكز التعبئة والاحصاء ، مجالات عمل الحاسب الألي ، مدرس ، باحث ، محلل بيانات ، في البنوك ، مسئول قواعد بيانات ، مبرمج في شركات الكمبيوتر.
١٠- ( رياضة / حاسب ): نفس الكلام ونفس شغل قسمي رياضة وحاسب لانك بتدرس نص المواد رياضه ونصها حاسب.
١١-رياضة / احصاء : نفس الكلام بس بتاخد نص دراستك رياضه ونصها احصاء.
١٢- ( رياضة / فيزياء ): بتدرس نص المواد رياضيات ونصها فيزياء ، بتدرس التجارب والقوانين والعلاقات الرياضيه والدوائر الكهربائيه ، بتدرس فيزياء الليزر وتطبيقاتها وفيزياء علمية وفيزياء حديثة وفيزياء نووية وغيرها ، ( مجالات العمل ): نفس شغل قسمي رياضة منفرد وفيزياء منفرد.
١٣- فلك منفرد : بتدرس تاريخ الفلك ، وأرصاد العين المجردة ، النظام الشمسي ، الظواهر الفلكية، حركات الكواكب والنجوم الظاهرية ، والحشود والنجوم وأنواعهم ، المادة بين النجمية ، والمجرات ، نشأة الكون بصفة عامة ، التعرف علي السماء ليلا ، خرائط النجوم ، الكواكب والكويكبات النجمية وطرق التعرف عليها وغيرها ، ( مجالات العمل ): فى مرصد حلوان ، مرصد القطامية ، باحث بمركز الاستشعار عن بعد او بالمركز القومي للبحوث الفلكية واي مركز في مصر فيه فيزيا ، هيئة الطاقة الشمسية ، المركز القومي للفلزات ، فى وكالة ناسا الفضائية زي عصام حجى.
١٤- رياضة / فلك: بتدرس نص المواد رياضه ونصها فلك وشغله نفس شغل فلك منفرد ورياضة منفرد.
تالت حاجة بقي هي الاقسام المشتركة للشعبتين:
١٥- كيمياء منفرد : بتدرس الكيمياء بكل فروعها عضويه وغير عضوية وحراريه وكهربيه وتحليليه وفيزيائية وحيوية وثيرمو والكترو واروماتيك وستريو وبروتين وكربوهيدرات وكوانتم ، ( مجالات العمل ) : فى معامل وشركات التحاليل الطبية ، شركات الادوية والاسمدة ومستحضرات التجميل والسكر والمياة والكهرباء ومصانع الزيوت والدهون والصابون والمنظفات الصناعية والدهانات وصناعة البطاريات والسبائك والحديد والصلب ، بيفضل فى شغل المصانع وفى الكيمياء الشرعية عن اى قسم اخر.
١٦- كيمياء / جيولوجيا : بيدرس نص مواده جيولوجيا ونصها كيمياء ( مجالات العمل ) : نفس شغل قسمي كيمياء وجيولوجيا منفرد.
١٧- كيمياء / فيزياء : يدرس نص مقرراته كيمياء ونصها فيزياء ، ( مجالات العمل ): نفس شغل قسمي الكيمياء والفيزياء.
١٨- فيزياء / فلك: بيدرس نص المواد فيزياء ونصها فلك ( مجالات العمل ) : نفس شغل قسمي فلك منفرد وفيزياء منفرد.
١٩- فيزياء / علوم جوية : شبيه للقسم اللي قبله لكن هنا بتدرس كل حاجة تخص الأرصاد الجوية بس مش انت اللي بتشتغل فى النشرة الجوية لا انت اللي بتجبلهم الداتا اللي هما بيقولوها وانت بقى بتدرس طبقات الغلاف الجوي و ازاي الرياح بتتحرك وهكذا ، بجانب انك ليك فرصه انك تشتغل في برج المراقبه في المطار علشان تشوف حالة الجو هاتسمح للطائرات تقلع ولا لأ.
٢٠- فيزياء منفرد: قسم عشاق الفيزياء ودراسته فيزياء كهربيه وحراريه وكل انواع الفيزياء ،القسم لازم تتخرج منة على الاقل بتقدير جيد جدا عشان تلاقي شغل محترم معيد في اي جامعة خاصة او شغل في هيئة الطاقة النووية ، وفية شغل في مصانع الاجهزه الكهربيه ومصانع الحديد والفحم بيكون فني بيمسك الالات الكبيرة وبيعملها حسابات زي حسابات الديناميكا الحرارية وهكذا، كفيزيائى طبي ، وشغل اكاديمي اكتر من كونة فني يعني باحثين في مراكز البحوث او في مدينة زويل او اعضاء هيئة تدريس فالجامعات او باحث في الجامعات الخاصة او الاجنبية او سيرن او وكالات الفضاء بتحتاج فزيائين او المفاعلات النووية بس كل دة خارج مصر.
٢١- جيوفيزياء: هي تطبيق لقوانين الفيزياء علي الجيولوجيا اللي هي علوم الارض وهو بيدرس الارض من ناحية الخواص الفيزيائية (مجالات العمل) : التنقيب قبل ما احفر عشان اطلع الحاجه سواء فى شركات البترول او المياة او المعادن او الابار او الاثار او اى حاجة تحت الارض.
بعد كده بقي هنيجي للبرامج الخاصة: برنامج علوم البترول الجيولوجية وبرنامج البيوتكنولوجي ، والتخصص فيهم بيكون من سنة اولى بدون شروط ومفتوحى العدد لاى طالب وبيكون ليه مصروفات بتختلف حسب الجامعة.
وبكده نكون اتكلمنا عن الكلية واقسامها وحقيقي الكلية جميلة وهتحبوها رغم صعوبتها بس علشان تحقق حاجة لازم تتعب و مفيش حاجى بتيجي بسهولة لازم يبقي الطريق صعب بس نهايته الحلوة هتعوض كل التعب ولو حد عنده اي استفسار تاني عن الكلية يقدر يتواصل معايا عن طريق الايميل saraalikotb1@yahoo.com ربنا يوفقكم يارب.