تعرف ‏على ‏تفاصيل ‏التحويل ‏وانواعه ‏وموعده ‏الحقيقى ‏.. ‏تفاصيل ‏تهم ‏كل ‏طالب ‏عاوز ‏يحول ‏كليته

Share it:
لو انت طالب فى ثانوية عامة مرحلة أولى أو فى اى مرحلة من المراحل اللى جاية و حابب تحول من الكلية اللى جاتلك فى بطاقة الترشيح لازم تعرف مجموعة من القواعد اللى تقدر من خلالها تنفذ عملية التحويل بشكل صحيح ولكن خلونا نتفق فى البداية كدة أن التحويلات اسمها تقليل اغتراب علشان هتلاقى الكلمة دى اكتر من مرة واحنا بنقرأ.

لازم تعرف أن التحويل دا بيبقي مرة واحده بس سواء اتقبل او اترفض ولو اتقبل فانت ملكش حق ترجع لرغبتك القديمة اللى فى بطاقة الترشيح،

كمان التحويل بيسمحلك فقط انك تحول لجامعة اخرى داخل النطاق الجغرافي (أ) فقط لمحافظتك يعني بوضوح اكتر مينفعش احول لحاجه ف اسوان وانا من الشرقية.

طيب أية هى انواع التحويل ؟ 

التحويل بيكون نوعين 

اول حاجة " تحويل مناظر " 

ودا انك تحول لنفسك الكلية اللي جتلك بس هي جتلك بعيده ف انت هتحول لبلدك، حتي لو مش جايب مجموعها في بلدك ( حتي لو مش جايب مجموعها ) المهم انها نفس الاسم مثلا من طب ل طب.

وفى نوع تانى وهو تحويل "غير مناظر"

او انك تحول لكليه مختلفه وبردو تكون داخل النطاق الجغرافي (أ) لازم بردو تكون ف بلدك وبشرط جايب مجموعها في بلدك مش في اي بلد تانيه ( لازم تجيب مجموعها ) زى مثلا كدة من طب لصيدله.

طيب لو انت اصلا جالك كليه داخل نطاق (أ) وانت عندك اكتر من جامعه في النطاق ده زي مثلا اللي من القاهرة وعندهم جامعه القاهرة وعين شمس وحلوان لو جالك واحده منهم وعاوز تحول ع واحده تانيه لازم تغير الكليه يعني النوع التاني فقط.

كمان لازم تبقى عارف ان لا يوجد تحويلات من قريب لبعيد، وفي كل الحالات وقت التحويل الموقع بيكتبهالك صريحه ان كان لك تحويل هيقولك لك تحويل وهيقولك الجامعه المسموح تحول لها وان كان ملكش تحويل هيقولك عفوا.

يعني باختصار كدة متوجعش دماغك التحويل بيبقي باختيار الوزاره انت مبتختارش حاجه انت بتقول يا اه يا لا

طيب التحويل بالنسبة (تقليل الاغتراب )

سواء كان لنفس الكلية او غيرت الكلية احتمال قبوله زي بعضه، الكليه بتحدد عدد معين تقبله بيكون 10% من العدد بتاعها، زى مثلا كليه اسنان في جامعه معينه خدت 200 طالب، بيبقي في 20 واحد هيتقبلو من التحويل لها
اعلي 20واحد في المحولين طيب ولو فرضنا فى ناس من طب جايبين اعلي منها وعاوزين يحولو لها وهما 50 واحد
وكمان اللي يحولو تقليل اغتراب مناظر جايبين اقل منها
هياخدو اعلي 20 منهم والباقي يترفض حتي لو جايب اعلي من مجموعها.

بالإضافة أن اذا كان كل المحولين لها مناظر يعني من اسنان ل اسنان كلهم مش جاييبن درجتها هياخدو اعلي 20 واحد بردو والباقي يترفض.

طيب ولو افترضنا 100 واحد محولين وكلهم نفس المجموع
الكليه ف الحاله دي بترفض كله ومش بتقبل حد لان مفيش 20 اعلي من الباقي .. ده مثال ينطبق ع الكل.

فمفيش حاجه اسمها مين فرصته اكبر، العبرة بالعدد ومجماميع الناس المحوله، بالمناسبة التحويل بيكون بعد اعلان نتيجه المرحله التانية، 

ولو انت مغير محل اقامتك ملناش دعوه التنسيق ميعرفش عنك غير مكان ما خدت شهاده الثانويه مفيش حاجه اسمها نقلت اقامتي او معايا عقد ايجار وكلام من دا خالص.

التحويل بيوديك علي محافظتك اللي خدت منها الثانويه العامة.
Share it:

اخبار ‏الطلاب

Post A Comment: