التقديم هيبدء من يوم السبت .. تعمل اي علشان تقدم صح فى مسابقة ٣٠ الف معلم ؟

Share it:
- تعمل اي يوم السبت القادم لما يتفتح باب التقديم فى مسابقة ٣٠ الف معلم ؟

- موقع التقديم هيتفتح يوم السبت الجاي والتقديم هيكون سهل جدا ومش محتاجة حاجة خالص ..  وهتلاقي اي حد بتاع سايبر هتلاقيه بيقدم لكل الناس او انت قدم لنفسك من البيت.

هتكون محضر الورق بتاعك كله كامل و متاخد اسكانر الوان.

- هتروح بنك مصر او البنك الاهلي وتقولهم انا هقدم في مسابقة التربية والتعليم وهتدفع 22 جنيه وتاخد ايصال وتمشي وروح ادفع الاسبوع الجاي.

- حضرتك هتاخد ورقك المطلوب ( الاصل ) بالايصال وتسحبه سكانر الوان عن طريق برنامج ع الموبايل اسمه Cam Scanner بتفتح الكاميرا وتصور الورقة عادي او  تسحبه في اي مكتبة ويطلعلك لكل ورقة صورة بتاخدهم ع الموبايل وانت واقف.

- لازم لازم تبقي مجهز ورقك قبل ما تقدم علي الموقع لان كل الورق دا هيترفع علي الموقع وانت قاعد في البيت او عند الراجل بتاع السايبر اللي هتقدم عنده.

- اللي هيشغل دماغه وهيروح يغيره محل اقامته ويروح محافظة تانية فيها عجز كبير ..  هيترفض. 

- اسحب ورقة الفيش خدها وش وضهر ومتقوليش هي وش بس .. اعمل زي ما قالك الله يرضي عليك وكذلك البطاقة 

- تربية عام او اداب او دار علوم او دراسات اسلامية مش مطلوبين الجولة دي من التقديم.

- السن ميزيدش عن 35 سنة .. يعني اي حد لسه متمش ال 35 سنة  قبل 26/6 ينفع يقدم عادي جدا.

- اللي بطاقته منتهية يروح يجددها مستعجل ومش بتاخد وقت.


- الاختبارات فيها جزء تربوي ونفسي وصحي وتخصص .. ومحدش يعرف نظام الاسئلة عامل ازاي عشان فيه ناس هتاخدها سبوبة وهتعملكم كورسات.

بس هات كتب الكلية بتاعت التربوي والتخصص واقرأ فيها وهات اسئلة المسابقة اللي فاتت واقراها واقرأ من ع النت حاجات عن التربوي وتخصصك وسلي نفسك في الاجازة اهو 

- الاختبارات بتكون امتي؟ 

= بعد ما تقدم الكتروني ويراجعوا ورقك وقبلوك يا معلم هوبا يبعتولك رسالة ويقولوا الف مبروك اختارناك  ..  ويقولك يرجي التوجه للمركز الفلاني لاجراء الاختبارات يوم كذا وساعتها هبقي هنعرف درجات القبول والكلام دا كله 
- حوار الخدمة العامة الناس اللي لسه بتعملها حاليا ويقوللك ينفع نقدم ! 

= انا قولت قبل كدا هما بيحتاجوا الشهادة يعني تكون خلصتها نهائي او اخدت اعفاء منها بس لازم يكون معاك شهادة او اثبات زي شهادة الجيش كدا 

- ينفع اقدم بافادة وانا لسه بعمل خدمة عامة ! 

= والله جرب اتقبلت كان بها متقبلتش استني السنة الجاية .. اصل معلش حط نفسك مكانه 
قدامك دلوقتي واحدة مخلصة خدمة عامة من سنتين مثلا وواحدة لسه بتعمل خدمة حاليا وفي محل خدمة الوطن
يا تري الاولوية لمين ومين هياخدها ..  ها جاوب ! 

- طب انا متخرجة سنة 2014 ومكنش علي ايامي خدمة عامة ينفع اقدم !؟ 
= اها قدمي عادي بس لازم تروحي مكتب الخدمة العامة عندك في المحافظة وتقوليلهم الوضع دا عشان ممكن يعطوكي ورقة او اثبات ان مكنش ليكي خدمة عامة وكدا وياريت اللي يروح يسأل يأكدلي ع الحته دي 

- طب انا تربية نوعية القسم الفلاني ينفع اقدم؟ 
= اللي، اعرفه من فترة قريبة ان فيه قسم في بعض كليات التربية وكذلك في بعض كليات التريية النوعية اسمه معلم فصل 
ودا المطلوب 

حط نفسك مكانه بس حضرتك خريج تربية نوعية موسيقي مثلا وفيه قدامك واحد خريج تربية اساسي عربي او شعبة معلم فصل
مين فرصته اقوي ف القبول طيب !؟ 
قولي كدا ها 

مش بحبطك يا تربية يا نوعية بس نشغل دماغنا وعلي العموم قدم مش هتخسر حاجة واهي تجربة .. احتاجوك كان بها مش احتاجوك خلاص يا سيدي نشوف السنة الجاية.

Share it:

وظائف

Post A Comment: